| وقتِ آخر ہی نظر رشکِ مسیحا کرتے |
| عمر گزری تھی مِری تیری تمنا کرتے |
| پھر سبھی واعظِ نادان بھی سجدہ کرتے |
| وہ کبھی سامنے گر نقشِ کفِ پا کرتے |
| ایک صورت یہی سجدہ اُنہیں کرنے کی تھی |
| ہم شجر ہوتے حجر ہوتے تو سجدہ کرتے |
| جوشِ وحشت پہ ہمیں ضبط بہت ہے ورنہ |
| اپنے دامن کو ہی ہم دامنِ صحرا کرتے |
| ہم سے بھی مثلِ انا الحق کوئی دعوی ہوتا |
| ہم بھی دنیا میں تری کوئی تماشہ کرتے |
| ہم کہ راضی بہ رضا جان لٹانے والے |
| ہم ترے ظلم و ستم کی نہیں پروا کرتے |
| مانتے ہم بھی یہ اعجازِ مسیحائی ترا |
| جو ہمارے دلِ تفتہ کا مداوا کرتے |
| تُو اگر ہوتا نہ میخانے صنم خانے میں |
| تاب ہم میں کہاں اِن کی جو تمنا کرتے |
| وہ تو بے ساختہ آنسو نکل آئے میرے |
| رازِ دل ان پہ مگر ہم تو نہ افشا کرتے |
| کیا یہی ہے تِرے دیوانوں کی قسمت جاناں |
| یاد میں تیری شب و روز ہیں تڑپا کرتے |
| لاج اگر شانِ کریمی کی نہ ہوتی مقصود |
| لازمی وہ سرِ محشر مجھے رسوا کرتے |
| میری قسمت میں بھی ہوتا کبھی ایسا شاہؔد |
| میں جو گرتا تو مجھے آپ سنبھالا کرتے |
معلومات