| اشک جب آنکھ سے گرتے ہیں تو مر جاتے ہیں |
| صبر سے کام نہ لیں ہم تو بکھر جاتے ہیں |
| جھیل سی آنکھوں میں ان کی مہِ روشن اتریں |
| آئینے دیکھ لیں ان کو تو نکھر جاتے ہیں |
| صبح دم نکلے تھے اب لوٹ کے جائیں ہم بھی |
| شام ہوتے ہی پرندے بھی تو گھر جاتے ہیں |
| شب گزاری کے لئے خواب ضروری تو نہیں |
| دن تو سوچوں میں جہاں چاہے گزر جاتے ہیں |
| رات جب گزری سفر میں ہے تو آرام کریں |
| تھک کے تارے بھی تو گھر وقتِ سحر جاتے ہیں |
| اٹھو سامان سمیٹو ہے سفر کٹنے کو |
| جب بھی آ جاتی ہے منزل تو اتر جاتے ہیں |
| سن کے الزام کسی کا نہ پڑیں مشکل میں |
| بس ہمارا جو چلے ہم بھی تو دھر جاتے ہیں |
| وقت دم لینے کو رکتا نہیں دیکھا اب تک |
| ہم ہی تھک جاتے ہیں جب دوجے نگر جاتے ہیں |
| قبر میں ڈال کے جب جاتے ہیں اپنے طارق |
| تب حوالے وہ خدا ہی کے تو کر جاتے ہیں |
معلومات