| ضروری تو نہیں تم جو کہو وہ حرفِ آخر ہو |
| ذرا سی شکل ہے تو کیا نہ مسجد ہو نہ مندر ہو |
| اگر کافر ادائیں ہیں تو اک مسلم کو ان سے کیا |
| جو چاہو ڈھونڈ لو ایسا جو ان سے بڑھ کے کافر ہو |
| ادب آداب سمجھانے سے اس کو کچھ نہیں حاصل |
| جسے آدابِ مجلس کا خصوصی درس ازبر ہو |
| تمہارے دَور میں شرفا کے ساتھ ایسا رویّہ تھا |
| کہ جیسے تم ہی دارا ہو تمہی آقائے برتر ہو |
| خداوندا تُو قادر ہے مگر وہ کیا جو بھُوکے ہیں |
| اگر وہ پوچھ لیں تجھ سے بتاؤ کیسے قادر ہو |
| ترے طرزِ تکلّم سے یہی کچھ آشکارا ہے |
| یہاں پر جتنے ناجائز ہیں تُم ان سب کے فادر ہو |
| بہت قانون بنتے ہیں بگڑتے ہیں سنورتے ہیں |
| کوئی ایسا بھی ہو یاربّ جہاں آدم برابر ہو |
| نہ کوئی قول نادر ہے نہ کوئی قافیہ اچھّا |
| سبھی الفاظ مسروقہ مگر دعویٰ ہے شاعر ہو |
| چھپا لو ساری نظمیں غزلیں قبلہ خواجہ صاحب اب |
| کہیں اپنے قبیلے سے کوئی دعویٰ نہ دائر ہو |
معلومات