| گو تِرے وصل کا لگتا نہیں امکاں جاناں |
| ہم تو کر بیٹھے تجھے ملنے کا پیماں جاناں |
| اس سے پہلے تو نہیں دیکھا کہیں تجھ سا حسیں |
| تیری مسکان پہ ہو جاؤں میں قرباں جاناں |
| اب بہار آئے گی، رخصت یہ خزاں ہوتی ہے |
| کیوں سمجھتا نہیں اس کو دلِ ناداں جاناں |
| حالِ دل تجھ کو سنانے میں نہ ہو بے ادبی |
| کیا کہوں سوچ کے ہوتا ہوں پریشاں جاناں! |
| میری محفل میں کمی ہے تو فقط تیری ہے |
| تیرے بن دل بھی دھڑکتا ہے تو جاناں جاناں! |
| اس قدر گرتے ہوئے دیکھے ہیں انساں میں نے |
| خود کو ڈر لگتا ہے کہتے ہوئے انساں جاناں |
| تُو نہیں تھا تو یہ دکھ درد مِرے ساتھ رہے |
| ان غموں کے بھی تو مجھ پہ رہے احساں جاناں |
| گر محبت ہمیں بازار میں مل جاتی کہیں |
| اس کے سودے میں تو دے دیتے دل و جاں جاناں |
| جو بھی ثاقبؔ نے لکھی ہے، وہ غزل تیرے لیے |
| اور ہوتا ہی نہیں کوئی بھی عنواں جاناں! |
معلومات