| جانتا ہوں میں مقدّر کا سکندر تو نہیں |
| میرے افکار ارسطو کے برابر تو نہیں |
| ہیں بہت موتی تہہِ آب صدف کے اندر |
| ہاں مری سوچ کی گہرائی سمندر تو نہیں |
| صاف دل رکھتا ہوں پاکیزہ تصوّر ہیں مرے |
| دل مرا گرچہ کوئی مسجد و مندر تو نہیں |
| ہے بھروسہ جو تری ذات پہ رکھتا ہوں یقیں |
| لوٹے جس در سے کوئی خالی ، ترا در تو نہیں |
| حوصلہ مجھ کو دیا تُو نے ہے گویائی کا |
| عرش تک پہنچے صدا حد کوئی امبر تو نہیں |
| جائزہ اپنا کبھی لے کے یہ بتلاؤں گا |
| رنگ اس کا ہی مرے خون کے اندر تو نہیں |
| مان لیتا ہوں کہے تُو جو ، تسلّی کر کے |
| یہ صدا آئی جہاں سے کوئی منبر تو نہیں |
| طارقؔ اوروں کی طرف دیکھ کے بھی شکر کرو |
| جو ملا تم کو سبھی کو وہ میسّر تو نہیں |
معلومات