| وہ مردِ جواں عزم ، جواں سال، جواں دل |
| ہوتا ہے کبھی صدیوں میں پیدا کوئی قابل |
| وہ ذات یگانہ تھی زمانے میں نمونہ |
| تنہا ہی بھری بزم تھی تنہا بھری محفل |
| وہ اہلِ خرد اہلِ جنوں اہلِ نظارہ |
| وہ عزم و جنوں پیکرِ اوصاف کے حامل |
| دیکھے جو تری آنکھ زمانے کے خد و خال |
| گویا کہ زمانہ تری آنکھوں میں ہو داخل |
| گفتار کی موجوں میں امنڈتا ہوا طوفاں |
| کردار کے پیکر میں تو دریا بھی تو ساحل |
| پرواز میں اونچائی نگاہوں میں بلندی |
| مہر و مہ و انجم نہ ثریا تیری منزل |
| کیا دل تھا کہ تھا جذبۂ ایثار سے سرشار |
| دل درد سے رنجور مگر چہرے سے خوش دل |
| گِر گِر کے سنبھل کر یہ ہنر ہم کو سکھایا |
| آزادی کا طالب کبھی ہوتا نہیں بزدل |
| اب گلشنِ ہندی میں نہیں بلبلِ نالاں |
| ہو تری جگر سوز نواؤں میں جو شامل |
| اُس جوش و جنوں عزم و وفا سے یہ پرے ہیں |
| افسوس ! کہ ہے اب بھی تری قوم تو غافل |
| جو شعلہ جہاں سوز ترے دل میں تھا روشن |
| وہ شعلہ جوانوں کو کہاں اب کی ہو حاصل |
| ہیں میرے رفیقوں میں بھی کچھ مردِ جگر دار |
| صد حیف! کہ ہیں زندہ مگر مردہ و بے دل |
| آگاہ کرے پھر سے کوئی قوم کو ان سے |
| شمشیر و سناں لیس ہیں جو بازوۓ قاتل |
| پیغام ہے اس دور کا پھر سے کوئی آزادؔ |
| سوئی ہوئی ملت کو جگاۓ کوئی عاقل |
| نقشِ رہِ آزاد پہ چل تو بھی اے شاہیؔ! |
| مشکل ہے ، مگر تیرے لیے کچھ نہیں مشکل |
| تو راہِ وفا کا کوئی بچھڑا ہوا راہی |
| ہو دور نگاہوں سے ، مگر دل میں ہو منزل |
معلومات