| یہ کیسا گھر ہے کہ جس میں کوئی کتاب نہیں |
| سیاہ رات ہے جس میں کہ ماہتاب نہیں |
| قریب سے جو وہ گزرا بغیر دیکھے مجھے |
| کہ اس سے بڑھ کے مِرے واسطے عذاب نہیں |
| وہ خاک میں نہ ملا دے کہیں خفا ہو کر |
| مِری وہ الفتیں، جن کا کوئی حساب نہیں |
| برا میں کیسے مناؤں گا اس کی نفرت کا |
| حساب میں وہ ابھی صاحبِ نصاب نہیں |
| ہاں ایک طرفہ محبت نہیں گناہ مگر |
| زیاں یہ وقت کا ہے، اس میں کچھ ثواب نہیں |
| خدایا رحم کا طالب ہوں بندۂ عاجز |
| کہ جس کی آنکھوں میں شہرت کا کوئی خواب نہیں |
| کوئی بھی راستہ چُن لو، ملیں گے کانٹے ہی |
| نصیب میں جو ہمارے کوئی گلاب نہیں |
| نہیں ہے آس بھی بجھنے کی پیاس اب ثاقبؔ |
| ہوں ایسے دشت میں جس میں کوئی سراب نہیں |
معلومات