| کس اشکِ انفعال سے خوں دھوئے کربلا |
| زیرِ علم ہے غرقِ الم کوئے کربلا |
| پلکوں سے چن رہے تھے فرشتے لہو کے پھول |
| باغِ ارم کو چاہیے خوشبوئے کربلا |
| آنکھوں میں تشنگی کا جو روزن ہے آتِشیں |
| پیاسا لبِ فرات کہاں سوئے کربلا |
| برسات فصل غم کی بھی تھم جائے اب کہاں |
| تا حشر زار زار یوں ہی روئے کربلا |
| بامِ نظر پہ چاند محرم کا آگیا |
| آنسو نکل پڑے ہیں رواں سوئے کربلا |
| پھرتی رہے گی پوچھتے بادِ صبا سوال |
| آکر سنوارے کس نے یہ گیسوئے کربلا |
| شیدؔا نہ لائی چشم فلک تاب، رو پڑی |
| شب بھر کا بوجھ حشر تلک ڈھوئے کربلا |
معلومات