| ہر وقت ہم اداس ہیں دلگیر ہر جگہ |
| چلتی ہے ساتھ شومیٔ تقدیر ہر جگہ |
| کر صبر ہر مقام پہ رکھ دِھیر ہر جگہ |
| انسان کم زیادہ ہیں خنزیر ہر جگہ |
| انصاف کچھ کسی نہ عدالت سے مل سکا |
| کھینچی تھی ہم نے عدل کی زنجیر ہر جگہ |
| جانے کی کعبہ پھر کوئی حاجت ہو کیوں ہمیں |
| پائیں دعا میں اپنی جو تاثیر ہر جگہ |
| ناپید ہو چکا ہے زمانے سے امن اب |
| یوں چل رہی ہے جنگ کی شمشیر ہر جگہ |
| آۓ گا انقلاب کہ اک داستانِ شوق |
| کر دی ہے ہم نے خون سے تحریر ہر جگہ |
| یہ اور بات اب وہ نمازی نہیں رہے |
| مسجد تو ہو رہی ہے یوں تعمیر ہر جگہ |
| ثالث ہی جب ملا ہوا ظالم کے ساتھ ہو |
| پھر کیوں نہ ہو کہ ظلم کی آخیر ہر جگہ |
| گر بھر گیا دلوں میں وہ ایمانِ حیدری |
| گونجے گا پھر سے نعرۂ تکبیر ہر جگہ |
| آتا ہوں مے کدے میں اے ساقی بس اس لۓ |
| ہوتی نہیں ہے اشکوں کی تبخیر ہر جگہ |
| خوابوں میں ، سوچ و فکر و تصور ، خیال میں |
| آتا نظر ہے اک رخِ تنویر ہر جگہ |
| پھر وہ مقامِ خلد ہو یا عالمِ فنا |
| ٹھہرے ہمیں ہیں موردِ تقصیر ہر جگہ |
| الزام کس طرح میں دوں ہم راز کو مرے |
| کرتے ہیں اشک درد کی تشہیر ہر جگہ |
| کچھ کام اپنے جذبۂ دل سے بھی لیجۓ |
| چلتی نہیں جناب ہے تدبیر ہر جگہ |
معلومات