| غزل |
| یہ چند روزہ خزاں کا شمار ہے پیارے |
| قریب آمدِ فصلِ بہار ہے پیارے |
| بگڑ گئیں تو دل و جاں، جگر سے جاؤ گے |
| حسین آنکھوں کا کچھ اعتبار ہے پیارے |
| کسی نے دیکھا ہے چاہت بھری نگاہوں سے |
| تبھی تو چہرے پہ اتنا نکھار ہے پیارے |
| بچا سکو تو بڑے شوق سے بچا لو دل |
| حسین شوخ نگاہوں کا وار ہے پیارے |
| نہ جانے کس کی اداؤں پہ کب پھسل جائے |
| نگوڑے دل پہ کسے اختیار ہے پیارے |
| کہو تو زندہ رہوں اور کہو تو مر جاؤں |
| تمھارے حکم پہ سب انحصار ہے پیارے |
| کِھلا کِھلا سا جو چہرہ ہے آخرِ شب میں |
| نسیمِ صبح کا اب انتظار ہے پیارے |
| سجا کے رکھ دیئے کس نے بساط پر مہرے |
| کوئی پیادہ تو کوئی سوار ہے پیارے |
| یہ چاہتے ہیں کہ زندہ رہیں ملے جنّت |
| ہمارے سر میں عجب انتشار ہے پیارے |
| ادا کروں تو کروں شکر کس نوازش کا |
| ستم خدا کا کرم بے شمار ہے پیارے |
| مرے سخن کی پزیرائی کی محبت سے |
| تمھارا حُسنِ نظر ہے یہ پیار ہے پیارے |
| کسی حسین کی آنکھوں کا فیض ہے شاید |
| شہاب تیری غزل میں خمار ہے پیارے |
| شہاب احمد |
| ۱۲ نومبر ۲۰۲۰ |
معلومات