| ہر گھڑی مجھ کو یہی اک وہم دامن گیر ہے |
| یہ جہاں اس کا ہے جس کے خواب کی تعبیر ہے |
| چند سِکّوں کے عوض کیوں بیچ ڈالا وہ بدن |
| جو کبھی شوہر کا تھا اب غیر کی جاگیر ہے |
| خال کے تِل سے من و تُو کا تصوّرمِٹ گیا |
| یہ ہے واحد تیرگی جو سب کو ہی اکسیر ہے |
| خُلد سے دھکّے ملے تو ایک ویرانے میں تھا |
| نا کوئی دھیلا نہ پیسہ نا کوئی تدبیر ہے |
| خیر و شر کے راستوں سے بے خبر چلتا رہا |
| شیخ فرماتے ہیں تیرے پاؤں کی زنجیر ہے |
| مَیں یہی سمجھا تھا تیرے جسم میں اک دل بھی ہے |
| کیا خبر تھی یہ تو میری سوچ کی تقصیر ہے |
| شیخ کو غُصّہ ہے میرے جُرّاتِ اظہار پر |
| کیا مقدّر کا گلہ کرنا کوئی تکفیر ہے |
| انتہائے جبر و جَور و ظلم میں گزری حیات |
| جنّتِ ارضی ہوں میرا نام ہی کشمیر ہے |
| ان کی زلفیں ان کی آنکھیں ان کے عشوے ان کے ناز |
| عشق کی ہیں وارداتیں حُسن کی تفسیر ہے |
| عالمِ برزخ میں ہو امید شاید ممکنات |
| کوئی آ کے کہہ دے تیرے خواب کی تعبیر ہے |
| بی۳ |
معلومات