یہ تیرے جَلووں کا ہے تَماشا، کہ مُجھ کو تابِ نَظر نہیں ہے

میں کیسے دیکھوں یہ تیرے جَلوے، کہ مُجھ کو اپنی خَبر نہیں ہے

میں جلوہ گاہِ جَناب بھی ہوں، میں تیرا حُسنِ شَباب بھی ہوں

قُصور سارا مِری نِظر کا، مِری نَظر خُود نِگر نہیں ہے

مِرے جُنوں کو مِلی بَصیرت، تو اُس نے تیرا یہ بھید پایا

تِری تَجلّی ہے تیرا پَردہ، یہ پَردہ چیزِ دِگر نہیں ہے

ہیں بھید پانے کی چاہتیں بھی، مُجھے ہیں مرغُوب راحتیں بھی

یہ بھید پا کے ہے جسنے کھولا، وَاں اُسکے شانوں پہ سَر نہیں ہے

لَگا تَماشا ہے خَیر و شَر کا، بہ ہر کہ صُورت ہے جِیت اُس کی

دِکھائے کوئی جَگہ وہ مُجھ کو، جَہاں پہ اُس کا اَمَر نہیں ہے

بُلا رہا ہے یہ طُور اَب بھی، وہ آئے جِس کو ہے آگ لینی

کَہاں کو جاتے ہو آگ لینے، کِیا طُور پر وہ شَجر نہیں ہے

وَفا کی رَاہوں میں پیش آئیں، مَقامِ پَست و بُلند لیکن

مَقام سَب ہیں مَقامِ اُلفت، کوئی مَقامِ دِِگر نہیں ہے

ہَزاروں صَدیاں اَگر تُو جی لے، نہیں ہے کوئی مَکان تیرا

مَکان سارے ہیں بے مَکاں کے، کوئی مکانِ خِضر نہیں ہے

تَلاشِ کامِل تُو کر خُدارا، بَغیرِ کامِل نہیں گُزارا

نِگاہِ کامِل ہے کام کرتی، تِری نَظر میں اَثر نہیں ہے

تِری نِگاہوں سے پی رہے تھے، یہ مست و بیخُود غُلام تیرے

مِلی جو آنکھیں مِری اچانک، تو بولے راہِ مَفر نہیں ہے

یہ رُوح میری اَبھی جَواں ہے، بہ شوقِ وَصلَت رَواں دَواں ہے

وِصال جب تک نہیں مُیسر، مُجھے سکونِ جِگر نہیں ہے

تِرا تَصوّر ہے میری دَولت، خِیال تیرا ہے میری ثَروت

خُدا سے مانگوں میں عِشق تیرا، کہ مُجھ میں کوئی ہُنر نہیں ہے

عَطا ہُوئی ہے یہ کیسی نِسبت، مِری جَبیں کو یہ تیرے دَر سے

جُھکے جَہاں پے وہ تیرا دَر ہے، اُٹھے جَہاں سے وہ دَر نہیں ہے

جَبینِ خواجہ مَہک رہی ہے، بَنُورِ آقاؐ دَمک رہی ہے

اَگر نبیؐ سے نہیں ہے اُلفت، تو پھر وَقارِ بَشر نہیں ہے

تِری عِنایت سے میرے خواجہ، فَنا کی مُجھ کو طَلب مِلی ہے

غُلام تیرا فَنا ہے تُجھ میں، بَقا کی اِس کو خَبر نہیں ہے