| کل ہوا آج تو اب آج کو ہے کل ہونا |
| اپنے افسانے کو آیا نہ مکمل ہونا |
| یعنی سب ٹھاٹ پڑا یوں ہی یہ رہ جائے گا |
| یعنی طے پایا ہے اس گھر کا مقفل ہونا |
| موسمِ وصل پہ اتراؤ نہ بانکے رسیا |
| ہجر کی شاخ پہ لکھا ہے جو حنظل ہونا |
| گردشِ وقت سکھاتا ہے سمٹنا کیا ہے |
| دھوپ میں اپنی ہی چھاؤں پہ مفصل ہونا |
| خواب چاہت کے جہاں بوئے دھنک سے مانگے |
| کس کو معلوم تھا اس جا کو ہے مقتل ہونا |
| ساعتِ وصل کا کفارہ ہے یہ فصل فراق |
| آنکھ روئے گی محبت میں ہے افضل ہونا |
| راکھ ہوتے ہوئے پروانے سے پایا شیدؔا |
| کس کو کہتے ہیں خسارے پہ توکل ہونا |
معلومات