| کٹھن تھی راہ بہت یہ تو اک بہانہ تھا |
| پہنچ گئے ہیں وہ آخر جنھوں نے آنا تھا |
| جو آ گئے ہیں تو وہ کشتیاں جلا آئے |
| انہوں نے لوٹ کے واپس کہاں پہ جانا تھا |
| خرد سمجھ نہیں پائی ہے عاشقوں کا مزاج |
| کہ عشق یوں بھی جنوں ہی کا شاخسانہ تھا |
| اگرچہ مجھ کو عداوت نہیں زمانے سے |
| ہمیشہ میرا مخالف مگر زمانہ تھا |
| تلاشنے جسے نکلے تھے لوگ دنیا میں |
| وہ میرے گھر میں سبھی علم کا خزانہ تھا |
| جُڑے رہے ہیں اگر دل ہمارے ساتھ اس کے |
| تو اس نے قُرب کا وعدہ بھی کیوں بُھلانا تھا |
| وفا جو کی ہے مسلسل تو بے وفائی کا |
| یونہی کسی نے یہ الزام کیوں لگانا تھا |
| اُسے میں کیا کہوں طارق ہو سوچ ہی جس کی |
| جلا کے گھر مرا اپنا جسے بچانا تھا |
معلومات