| مُجھ سے جو تقصیر ہوئی تھی |
| وہ میری زنجیر ہوئی تھی |
| کچھ یادیں اور کچھ کاغذ تھے |
| جو اپنی جاگیر ہوئی تھی |
| راکھ ہوئی وہ بستی جس دن |
| رُوح مری دِل گیر ہوئی تھی |
| بوجھ غموں کا سہتے سہتے |
| ہر اِک شے زنجیر ہوئی تھی |
| جس نے میرا سب کچھ بدلا |
| وہ میری تقدیر ہوئی تھی |
| اِک دوجے کی چاہت میں پھر |
| مَیں رانجھا وہ ہیر ہوئی تھی |
| میں نے اُس سے باتیں کی ہیں |
| صورت جو تصویر ہوئی تھی |
| جاتے ہوئے جاویدؔ تمہیں تو |
| پہلے بھی تاخیر ہوئی تھی |
معلومات