| وفائیں بھی ضروری ہیں جفائیں بھی ضروری ہیں |
| مری جاں عشق میں تیرے سزائیں بھی ضروری ہیں |
| کبھی پردہ کبھی چلمن کبھی ہے دل لگی کوئی |
| تڑپنے سے بچھڑنے تک ادائیں بھی ضروری ہیں |
| پکارو گے بلاؤ گے ہمیں ڈھونڈو گے تم ہر سو |
| کسی کو پا کے کھونے کی خطائیں بھی ضروری ہیں |
| بہت بے رنگ لمحوں میں عجب جیون کے سپنوں میں |
| حسیں رنگوں میں ڈوبی کچھ ردائیں بھی ضروری ہیں |
| چلو اک بار پھر سے ہم محبت اوڑھ لیں خود پر |
| محبت کی عبادت میں عبائیں بھی ضروری ہیں |
| محبت مار دیتی ہے یقیں ہم کو بھی ہے لیکن |
| اسی سر دھڑ کی بازی میں صدائیں بھی ضروری ہیں |
| تمہارے عشق میں رونا تمہاری یاد میں سونا |
| محبت کے جہاں میں کچھ عطائیں بھی ضروری ہیں |
| کٹے جو سر کسی کے پیار میں یہ بھی سعادت ہے |
| اسی کٹنے سے مرنے تک دعائیں بھی ضروری ہیں |
| تمہارے دل میں میری جاں بتاؤ کون رہتا ہے |
| چلو جھوٹا ہی کہہ دو تم بلائیں بھی ضروری ہیں |
معلومات