| یونہی خاموشیوں کی ادا کب تلک |
| یوں تماشائیوں کی صدا کب تلک |
| ہاتھ شمشیر سے ہیں تہی اور ہم |
| ہر گھڑی ہوں بدستِ دعا کب تلک |
| ظلم کی انتہا ہوگئی ہے یہاں |
| ظلم سہتے رہیں گے خدا کب تلک |
| کررہے ہیں ابھی اور کرتے رہیں |
| دینِ اسلام سے ہم جفا کب تلک |
| عزتوں کے لبادے کو ہم اوڑھ کر |
| ہم رہیں بے ادب بے حیا کب تلک |
| دامنِ عظمتِ مصطفی چاک ہے |
| ہم پہنتے رہیں گے قبا کب تلک |
| دہر میں چاک کرتے رہیں بد نہاد |
| آبروئے نبیِ خدا کب تلک |
| گلشنِ عشق ویراں رہے اور کیوں |
| کہہ رہے ہیں یہ اہلِ وفا کب تلک |
| ہم مسلمان ہیں ایک جاں ایک جسم |
| ایک دوجے سے ہوں پھر جدا کب تلک |
| چھوڑ کر اہلِ حق کی اداؤں کو ہم |
| اہلِ باطل پہ ہوں گے فدا کب تلک |
| حکمرانی ہماری روایات ہیں |
| ہاتھ میں لے کے بیٹھے گدا کب تلک |
| شاہی ؔ تو بھی تو ناداں نہیں اب رہے |
| غافلوں میں رہے خوامخواہ کب تلک ؔ |
معلومات