| جس قدر ہے شوخی تجھ میں جس قدر گفتار ہے |
| اس سے بڑھ کر تیری ہستی پیکرِ کردار ہے |
| رشک تجھ پر آج بھی ہے اے "بہارستاں" کے پھول |
| تیری خوشبو سے معطر اب تلک گلزار ہے |
| ہے خزاں دیدہ تری ہستی کے بن باغِ بہار |
| تجھ سے ہے حسنِ بہاراں شوخیٔ گلزار ہے |
| حسنِ عالم تاب تیری دید کو بیتاب دل |
| چشمِ مضطر جاں بلب ہے طالبِ دیدار ہے |
| قوتِ فکر و عمل شیدا ترے کردار پر |
| کاروانِ علم و عرفاں کا سپہ سالار ہے |
| آشناۓ ملک و ملت اے سیاست آفریں |
| حال و استقبال بیں تو ہر نفس بیدار ہے |
| کیسے کیسے عزم کے پیکر کیے پیدا بِہار |
| آج لیکن سرفروشوں سے پرے دربار ہے |
| حسنِ کردار و عمل کا ایک بھی پیکر نہیں |
| جانشینوں میں بھلے ہی جرأتِ گفتار ہے |
| جام و مینا بہ گئے ہیں رند بھی بہکے گیے |
| مے کدہ ویراں ہے ساقی خستہ دل مے خوار ہے |
| ڈھونڈتا پھرتا ہوں ہردم تیرے نقشِ پا کو میں |
| آج پھر سے دل کو میرے جستجوۓ یار ہے |
| قوم و ملت کے محافظ پاسبانِ ملک و دیں |
| ترے مقصد پر مری سو جان بھی ایثار ہے |
| ہے مگر مجھ کو شکایت جانشینوں سے ترے |
| ملک و ملت کا محافظ آج کیوں بیزار ہے |
| بو المحاسن حضرتِ سجادؔ میرِ کارواں |
| جس کے نقش پا پہ چل کر ذرہ بھی کہسار ہے |
| وہ جنوں پرور جواں دل آج بھی ہے دہر میں |
| خالدِؔ جانباز ہے یا حیدرِؔ کرار ہے |
| دیدۂ دل وا کرے کوئی اگر تو دیکھ لے |
| دستِ قدرت کا نمونہ شاہؔی بھی شہکار ہے |
معلومات