| من صاف رکھ یہ فکر نہ کر ہو گا تن خراب |
| دیکھا نہ جائے گا کہ ہے یہ پیرہن خراب |
| جلتی جہاں ہے شمع تو ہوں گے وہاں پتنگ |
| ہاں یہ خیال رکھ کہ نہ ہو انجمن خراب |
| چاروں طرف صنم بنی دنیا ہے بت کدہ |
| لیکن کرے نہ کوئی یہاں تیرا من خراب |
| مشروب کچھ نہ اور ہمیں پیش کیجئے |
| وہ کر رہے ہیں لذّتِ کام و دہَن خراب |
| شیریں نہ صبر کا ہو پھل اندازہ کیجئے |
| محنت جو عمر بھر کرے ہو کوہ کن خراب |
| دانتوں میں دیتے انگلیاں دیکھے وہی گئے |
| یوسف کے دیکھ لو کہ ہوئے طعنہ زن خراب |
| جس کے لئے خدا کو بھی ناراض کر دیا |
| اولاد کر نہ دے کہیں تیرا کفن خراب |
| بچتے ہیں بس شہید ہی زندہ ہوں جو سدا |
| مرنے کے بعد ہوتے ہیں اکثر بدن خراب |
| کوشش تو کی ہے احسنِ تقویم کی ہو بات |
| ملبوس میں مرے نہ ہو کوئی شکن خراب |
| طارق عدُو کا ذکر بھی اچھی طرح سے ہو |
| اس کو برا کہو گے تو ہو گا سخن خراب |
معلومات