| روٹھ جائیں تو منانے نہیں آتا کوئی |
| بات سننے یا سنانے نہیں آتا کوئی |
| رات تاریک تھی اتنی کہ سَحَر ہو نہ سکی |
| ان اندھیروں کو مٹانے نہیں آتا کوئی |
| جب تلک چلتے رہے گرتے رہے اٹھتے رہے |
| وقت بدلا تو اٹھانے نہیں آتا کوئی |
| کیا عجب لوگ ہیں رشتوں میں دراڑیں ڈالیں |
| آگ بھڑکا کے بجھانے نہیں آتا کوئی |
| سارے کہتے ہیں کہ حاضر ہیں کوئی کام ہو گر |
| جب ضرورت ہو بچانے نہیں آتا کوئی |
| کم نگاہی نے بھلایا ہے مسلمان کو درس |
| تبھی بچھڑوں کو ملانے نہیں آتا کوئی |
| وہ بھی کیا دن تھے کہ ہر بات پہ مطعون رہے |
| اب تو باتیں بھی جتانے نہیں آتا کوئی |
| جشنِ مُطرب ہے مغنّی نے کہا تال ملا |
| بھوک کا جشن منانے نہیں آتا کوئی |
معلومات