| دل میں بڑھتی ہوئی ویرانی کی تصویر بنا |
| آئنہ توڑ کے حیرانی کی تصویر بنا |
| میں بناتا ہوں کسی دشت میں جلتے خیمے |
| اور تو بہتے ہوئے پانی کی تصویر بنا |
| شوقِ تبدیلیِ انسان کو حیرت میں بدل |
| خون میں تر ہوئی پیشانی کی تصویر بنا |
| سب کے سب رنگ ترے دستِ ہنر خیز میں ہیں |
| دیکھ کر مجھ کو پریشانی کی تصویر بنا |
| چھوڑ دے وادیِ الفت میں غزالِ بوسہ |
| آ مرے سینے پہ نادانی کی تصویر بنا |
| سر کیا جائے گا کب ہم سے ترا دشتِ گریز |
| چشمِ گریہ میں فراوانی کی تصویر بنا |
| دستِ غربت پہ اٹھا قتل شدہ خواب کی لاش |
| ریت پر خوں سے بیابانی کی تصویر بنا |
معلومات