| قصۂ عشق بھلا کیسے کہوں ختم ہوا |
| کھیل سب ختم ہوا کارِ فسوں ختم ہوا |
| برملا ختم ہوئے سارے تعلق یہ نہ پوچھ |
| وہ کہاں ختم ہوا اور یہ کیوں ختم ہوا |
| مل گئیں منزلیں ایسی جنہیں چاہا بھی نہ تھا |
| آہ اب کوششِ پیہم کا جنوں ختم ہوا |
| کس کو فرصت ہے جو اس شہر کا نوحہ لکھے |
| قریۂ ظالم و بیکار و زبوں ختم ہوا |
| اس طرح ڈیرے جمائے ہیں نحوست نے یہاں |
| امن رخصت ہوا اس گھر سے سکوں ختم ہوا |
| کس کو یارا ہے کہ سیلابِ بلا روک سکے |
| جوش خوردہ تھا جو غیرت سے وہ خوں ختم ہوا |
| فیصلہ کیسے کریں سود و زیاں کا انجم |
| حاصلِ عمر تھا یہ سوزِ دروں ختم ہوا |
معلومات