| ہم محبت تو کم نہیں کرتے |
| ہاں فسانے رقم نہیں کرتے |
| دل دکھاتے ہو روٹھ جاتے ہو |
| اس طرح تو صنم نہیں کرتے |
| پیار تو کیا بڑھاؤ گے تم لوگ |
| دل کی نفرت بھی کم نہیں کرتے |
| شرف وعزت خدا نہ دے جس کو |
| اس کی تکریم ہم نہیں کرتے |
| نیک و بد کا شعور ہے لازم |
| ان کو قطعاً بہم نہیں کرتے |
| غرقِ دنیا ہیں اہلِ دانش بھی |
| آخرت کا یہ غم نہیں کرتے |
| جان لو گے بھلا ہماری کیا |
| اس قدر بھی ستم نہیں کرتے |
| بات جب تک نہ ہو صداقت کی |
| ہم سُپردِ قلم نہیں کرتے |
| ہم ہیں دیوانے آلِ احمد جو |
| سر کٹاتے ہیں خم نہیں کرتے |
معلومات