عفو کے خواستگار روتے ہیں |
شاہ کے سوگوار روتے ہیں |
ذکر کرتا ہوں ابنِ حیدر کا |
لفظ زار و قطار روتے ہیں |
لختِ شیرِ خدا رہے محصور |
اس خطا پر حصار روتے ہیں |
جونہی آغاز ہو محرم کا |
روز لیل و نہار روتے ہیں |
تاکہ تازہ رہے غمِ شبیر |
ہم تبھی بار بار روتے ہیں |
ریگِ دشتِ بلا کے سب ذرات |
خود پہ ہیں شرم سار ، روتے ہیں |
یادِ کربل میں رونے والوں کے |
ساتھ سب غم گسار روتے ہیں |
ایک واحد حسین ہیں جن کے |
سارے سیرت نگار روتے ہیں |
بے بسی پر فرات کی آسیؔ |
آج تک آب شار روتے ہیں |
معلومات