| مجھ پہ نا مہربان چلتی ہے |
| عمر سے کھینچ تان چلتی ہے |
| میری نس نس میں دوڑتا ہے عشق |
| جیسے رگ رگ میں جان چلتی ہے |
| قدم ایسے اٹھا مری جانب |
| جیسے فر فر زبان چلتی ہے |
| جنسِ زن ! شکریہ ترا ، تجھ سے |
| شاعری کی دکان چلتی ہے |
| غیر محسوس آرزوئے لمس |
| دونوں کے درمیان چلتی ہے |
| ٹوک دیتا ہے نا سمجھ کوئی |
| جب ذرا داستان چلتی ہے |
| پھول جیسی ہے وہ مگر مرے ساتھ |
| ساتھ بن کر چٹان چلتی ہے |
| کوئی کرتا نہیں ہنر تسلیم |
| نبض جب تک جوان چلتی ہے |
| نہ خلافِ یقیں رکے ہے زیست |
| نہ بقدرِ گمان چلتی ہے |
| بر سرِ بزمِ دوستاں غیبت |
| مان چاہے نہ مان چلتی ہے |
| آہ آسیؔ مری مدینے سے |
| جانبِ آسمان چلتی ہے |
معلومات