| یہی دستور سنتے آئے ہیں اب تک زمانے کا |
| گرا جو آشیاں سوچے گا واپس کون رکھنے کا |
| نہیں اس کے سوا حق نقطہ چینی کا کسی کو بھی |
| وہی لے امتحاں ہو تجربہ جس کو پرکھنے کا |
| کٹہرے میں وہی لائے جو دامن صاف رکھتا ہو |
| نہ ہو امکان بھی جس پر کسی انگلی کے اٹھنے کا |
| سُنو گر حوصلہ تنقید سننے کا بھی رکھتے ہو |
| نرا لفّاظی ہی مقصد نہیں ہے شعر کہنے کا |
| فقط ذکرِ گُل و بلبل نہ ہو پیغام ہو کوئی |
| سبق جس سے ملے کوئی یہاں مل جُل کے رہنے کا |
| اگر لفظوں میں سچ کو جھوٹ ثابت کر دیا جائے |
| تو پھر معیار ہے یہ قوم کے اخلاق گرنے کا |
| مرے الفاظ تب اشعار کی صورت میں ڈھلتے ہیں |
| تسلّی دل کو دے جب تجربہ سچ کو پرکھنے کا |
| جو بیٹھے آئینے کے سامنے گھنٹوں لگاتے ہیں |
| ودیعت ان کو قدرت نے کیا جذبہ سنورنے کا |
| مگر جس کو خدا نے اپنے ہاتھوں سے سنوارا ہے |
| نہیں محتاج وہ ہوتا کسی صورت بھی گہنے کا |
| مجھے سچائی کی خوشبو ہمیشہ اچھی لگتی ہے |
| اگر چہ پیش کر دے کوئی جھوٹا پھول سونے کا |
| کہاں تک ہم نے جانا ہے مسافر دو گھڑی کے ہیں |
| نہ جانے وقت کب آ جائے گاڑی سے اترنے کا |
| مگر حق بات طارق تم یونہی کہتے چلے جانا |
| سنے گا حوصلہ جس کو بھی ہو گا کان دھرنے کا |
معلومات