| بات ان سے کیا کرتے، اس زباں پہ چھالے ہیں |
| لب نہیں کھلے اپنے، ان پہ کب سے تالے ہیں |
| دیکھ کر تری آنکھیں، خواب کتنے پالے تھے |
| اب انہی نگاہوں میں اجنبی اجالے ہیں |
| عمر بھر جسے چاہا، اس سے کچھ نہ کہہ پائے |
| دل کے سارے رستوں پر خامشی کے جالے ہیں |
| ہم نے اپنے سینے میں یاد کے دیے رکھے |
| جن کو لوگ بھولے تھے، ہم نے وہ سنبھالے ہیں |
| نقش کچھ یہاں ہم نے روح میں بسائے تھے |
| آج اپنی یادوں سے نقش وہ نکالے ہیں |
| درد جو چھپاتے تھے، مسکراہٹوں میں ہم |
| وقت نے وہی غم اب آنسوؤں میں ڈھالے ہیں |
| شاہدؔ، اس محبت سے ہم نے یہ سبق پایا |
| جس کو دل میں رکھا ہے، اس کے غم بھی پالے ہیں |
معلومات