| ہر یاد میرے مولا اب معتبر رہے |
| من میں ہوں مصطفیٰ ہی چاہے جدھر رہے |
| زینت خیال کو دے نورِ جمالِ حق |
| لمحاتِ زندگی میں یہ ہی ڈگر رہے |
| خیر البشر بنے ہیں مقصودِ زندگی |
| رستہ یہ منزلوں کا آسان تر رہے |
| دنیا کے اس چمن سے جانا ہے ایک دن |
| داتا شکستہ دل پر تیری نظر رہے |
| فیضِ نبی ہے قاطع ظلماتِ دہر کا |
| ہر آن نورِ یزداں تو جلوہ گر رہے |
| شہرِ مدینہ آؤں گلیوں میں بھول جاؤں |
| لیکن درِ عطا سے ملتی خبر رہے |
| دربارِ مصطفیٰ میں آؤں میں سرنگوں |
| ہے نامہ عیب والا جو در گزر رہے |
| بھولے ہوئے ہیں گو ہم فیضِ جلیل کو |
| اِن سر کشوں سے ناطہ آقا مگر رہے |
| تیری شفاعتیں ہیں محشر میں خیر سے |
| اب حوصلہ یہ اونچا فاتح بدر رہے |
| میرے یہ سپنے ہادی دائم سجے رہیں |
| جلوے سے حسنِ جاں کے دل میں اثر رہے |
| آراستہ ہوں یادیں حسنِ نبی سے تام |
| ہر آن نامِ دلبر پیارا ذکر رہے |
| دنیا میں سرخرو ہو عقبٰی میں ہو غنی |
| سنت رسول جس کے پیشِ نظر رہے |
| لطفِ درِ کریمی محمود جب ملے |
| کر عرض کبریا سے ساری خبر رہے |
معلومات