| خزاں میں بدلی بہاروں سے ڈر نہیں لگتا |
| تمہیں خدا کے اشاروں سے ڈر نہیں لگتا |
| وہ کون گھر سے نکالے گئے تھے یاد کرو |
| تمہیں بھی ہجر کے ماروں سے ڈر نہیں لگتا |
| وہ لوگ دن میں بھی سورج کی پوجا کرتے ہیں |
| ہمیں تو رات کو تاروں سے ڈر نہیں لگتا |
| جنونِ عشق نے ہم کو سکھا دیا جینا |
| وہ ساتھ ہو تو ہزاروں سے ڈر نہیں لگتا |
| خدا بنا کے جو بیٹھے ہو مُردہ لوگوں کو |
| ہمیں تمہارے مزاروں سے ڈر نہیں لگتا |
| ابھی سے بھول گئے ہو مخالفوں کا حشر |
| کہو خدا کے پیاروں سے ڈر نہیں لگتا |
| تمہیں بھروسہ ہے جن پر ہیں راندۂ درگاہ |
| تمہارے جھوٹے سہاروں سے ڈر نہیں لگتا |
| کئے گئے ہیں جو تخلیق دشمنی کے لئے |
| ہمیں تو ایسے اداروں سے ڈر نہیں لگتا |
| مخالفت میں ہزاروں ہی روز لکھ لکھ کر |
| جو بانٹتے ہو شماروں سے ڈر نہیں لگتا |
| جلو گے آگ میں اپنی جلا کے خود ہی تم |
| ہمیں تمہارے شراروں سے ڈر نہیں لگتا |
| لکھا گیا ہے پہنچنا نصیب میں طارق |
| ہمیں زمیں کے کناروں سے ڈر نہیں لگتا |
معلومات