| غزل |
| ہر گھڑی رحمتِ یزداں کا طلب گار ہوں میں |
| خُوب معلوم ہے انساں ہوں خطا کار ہوں میں |
| وسعتِ ظرفِِ کرم دیکھ کہ فرماتے ہیں |
| متقی ہے کہ تُو عاصی ہے مدد گار ہوں میں |
| پھل لدے باغ بھی شعلوں کے حوالے کر دوں |
| خوب کہتے ہیں خسارے کا خریدار ہوں میں |
| کل جنہیں خلّت و منصب سے نوازا بےجا |
| اُن فرشتوں کی عدالت ہے، گنہگار ہوں میں |
| ظلمتِ گردشِ دَوراں میں کشش خوب مگر |
| گیسوئے یار کی الجھن میں گرفتار ہوں میں |
| تخلیئے میں تو بضد روز طلب کرتے ہیں |
| رونقِ بزم میں رائندہِ دربار ہوں میں |
| ناز نخروں پہ دل و جان تصدق لیکن |
| آتشِ رشکِ رقیباں سے خبردار ہوں میں |
| جدتِ فکر و نظر گرچہ اثاثہ ہیں شہاب |
| خوبیِ و حُسنِ رِوایت کا پرستار ہوں میں |
| شہاب احمد |
| ۱۸ اکتوبر ۲۰۲۴ |
معلومات