| استغاثہ بہ حضور سرورِ کائنات صلی اللّٰہ تعالیٰ علیہ وآلہٖ وصحبہ وبارک وسلم |
| فریاد کناں : محمد حسین مشاہد رضوی |
| سر اُٹھائے ہے شر رسول اللہ |
| وقت ہے پُر خطر رسول اللہ |
| سخت مشکل میں ہیں مکینِ وطن |
| لیجیے گا خبر رسول اللہ |
| جوش پر ظالموں کی شدت ہے |
| کیجے ہم پر نظر رسول اللہ |
| عرصۂ زیست ہوگیا ہے تنگ |
| عہد ہے پر ضرر رسول اللہ |
| حوصلہ دیں مقابلِ باطل |
| ہم ہوں سینہ سپر رسول اللہ |
| ہاے افسوس ہادیانِ ملل |
| ہیں اسیرانِ زر رسول اللہ |
| کوئی پُرسانِ حالِ زار نہیں |
| ہم کو بخشیں ظفر رسول اللہ |
| بھول بیٹھے ہیں آپ کی سیرت |
| ہم ہوئے بے ہنر رسول اللہ |
| پھر ہماری دعا مؤثِر ہو |
| چھن گیا ہے اثر رسول اللہ |
| پھر مدینے کی یاد آتی ہے |
| اب کے اذنِ سفر رسول اللہ |
| پائے مرہم مُشاہدِ مضطر |
| اے مرے چارہ گر رسول اللہ |
معلومات