| جیت پہ شک ہے ہار پہ شک ہے |
| مجھ کو ہر کردار پہ شک ہے |
| قاضی پر سالار پہ شک ہے |
| کٹھ پُتلی سرکار پہ شک ہے |
| گھر گھر پھیلی فرقہ بندی |
| دیں کے ٹھیکہ دار پہ شک ہے |
| کون ہے قاتل کون مسیحا؟ |
| دشمن کے ہر وار پہ شک ہے |
| بھوک ہوس کی لے ڈوبے گی |
| مفلس کو زردار پہ شک ہے |
| عزت کے ہتھیارے چیخیں |
| ہر اک عزت دار پہ شک ہے |
| گھر میں بھی ہیں شک کے پہرے |
| کھڑکی، در، دیوار پہ شک ہے |
| رشتے ناطے پیار محبت |
| ان سب کےایثار پہ شک ہے |
| وصل بھلا ہوتا بھی کیسے؟ |
| دونوں ہی کو پیار پہ شک ہے |
| گھر کا بھیدی لنکا ڈھائے |
| اندر کے غدار پہ شک ہے |
| سانپوں سے ہے اپنی یاری |
| مطلب کے ہر یار پہ شک ہے |
| سچوں کی خاموشی پر اور |
| جھوٹوں کی تکرار پہ شک ہے |
| کس کو اپنا سمجھیں اب ہم |
| اک اک رشتہ دار پہ شک ہے |
| ناداں اب تک انکاری ہیں |
| اُن کو اس اوتار پہ شک ہے |
| ماں کی ہستی شک سے بالا |
| باقی سب سنسار پہ شک ہے |
معلومات