| کسی گماں کسی فرقت کی پاسداری ہے |
| فصیلِ گرد میں وحشت کی کاشتکاری ہے |
| ترے فراق میں یہ کیسی خواب کاری ہے |
| ترا خیال کہ جاری تھا اور جاری ہے |
| تمام عمر کا مرنا تو سخت بھاری ہے |
| زہے نصیب اشارہ ہو، جانثاری ہے |
| اگرچہ پھیرنا منہ ایک ناگواری ہے |
| مگر کسے کہیں؟ دنیا ہے! دنیا داری ہے! |
| تمہارے بعد شب و روز یاد طاری |
| گلوں میں رنگ نہیں گھر میں سوگواری ہے |
| کیا ہے خوار تسلی سے زندگی نے مگر |
| ادا سے زندہ ہوں ہر چند بردباری ہے |
| بجز خلل نہیں ہے کچھ بھی خانۂِ دل میں |
| گماں سے بہتی ہوئی شب کی پائداری ہے |
| ابھی بھی قیس ہیں بادہ ہے حسن ہے اور ہجر |
| سو دہر میں ابھی بھی ایک وضعداری ہے |
| ہے جس کی عادتوں میں الفتوں کی تیز روی |
| وہ ہار جاتا ہے سب کچھ وہ اک جواری ہے |
| بسر ہوئی ہے شبِ وصل کس کی اور کہاں |
| جدید دور ہے یہ سب کو جانکاری |
| وہ حالِ حجرۂِ دل ٹوٹی ہوئی ہیں چیزیں |
| یوں لگتا ہے کسی نے خامشی اتاری ہے |
| فصیلِ شہرِ دلِ خاص بے سہارہ و آس |
| مچاؤ لوٹ میاں تم کو لوٹ پیاری ہے |
| بھلے کی بات ہے اے زیبؔ رفتگاں کی بات |
| خرامِ رفتہ اُسی سمت استواری ہے |
معلومات