| غزل ( فلسطین کے نام) |
| بولو بولو ہمیں بُرا بولو |
| ظلم ہم نے بڑا کیا بولو |
| آج چوٹی پکڑ کے ظالم کی |
| ہم نے اَوندھا گِرا دیا بولو |
| خُون آلود دانت توڑ دیئے |
| خُوب گھونسا رَسد کیا بولو |
| ایک مکروہ گھناؤنے چہرے سے |
| ہم نے پردہ اُٹھا دیا بولو |
| آہنی ہاتھ ٹوٹ سکتے ہیں |
| ہم نے ثابت یہ کر دیا بولو |
| رَوز و شب جھوٹ کے کرو چرچے |
| حَق جو بولے اُسے بُرا بولو |
| کون مظلوم کون ظالم ہے |
| آج کرتے ہیں فیصلہ بولو |
| ساٹھ ستر برس فلسطیں میں |
| خُون کِس کا بھلا بہا بولو؟ |
| جرُم کیا ہے؟ غزہ کے لوگوں کا |
| کیوں کیا ہے محاصرہ بولو؟ |
| جھوٹ سونے میں تولتے ہو تم |
| سچ جو بولے کڑی سزا بولو |
| ظلم برپا ہے جوفلسطیں میں |
| تم پہ کیوں کر نہیں رَوا بولو؟ |
| انبیإ کے وطن فلسطیں کو |
| قتل گاہ میں بدل دیا بولو |
| ظلم سے نازیوں کو شرمایا |
| شرم آتی نہیں ؟ بتا۔ بولو |
| مشق جاری ہے بربریت کی |
| جھوٹ بولوں اَگر، بُرا بولو |
| شعر عمدہ شہاب کہتے ہو |
| حَق بِلا خَوف، بَرملا بولو |
| شہاب احمد |
| ۱۳ اکتوبر ۲۰۲۳ |
معلومات