| ترکِ تعلقات پہ دل بے خبر ہے زیبؔ |
| پھر اپنے پاس ایک یہی تو ہنر ہے زیبؔ |
| کچھ تو لحاظ ہوتا مروت میں ہجر کا |
| کتنا شدید ظلم تھا جو بے ضرر ہے زیبؔ |
| کیسے عجب سراب میں الجھا ہوا ہوں میں |
| منزل کوئی نہیں مری، پھر بھی سفر ہے زیبؔ |
| رعنائیِ جہان سے وابستگی تو ٹھیک |
| لیکن درونِ ذات تو تاریک تر ہے زیبؔ |
| سب نے مکھوٹے پہنے ہیں ان زرد چہروں پر |
| کس حال میں ہے حال یہ کس کو خبر ہے زیبؔ |
| دفتر لگا ہوا ہے اداکاریوں کا یاں |
| ہر شخص دل میں محوِ فریب و مکَر ہے زیبؔ |
| رسمِ وداع کر کے یہ بھی جبر کر لیا |
| میری نگاہ شوق کسی آس پر ہے زیبؔ |
| گھڑیال بھی دیوار پہ ہنستا ہے دیکھ کر |
| ہر سانس پر ہے ضرب بدن پر ضرر ہے زیبؔ |
| میں جھنجلا کے بسترِ بوسیدہ پر گرا |
| آسیبِ آرزوۓ ابد میرے سر ہے زیبؔ |
| کس منہ سے پوچھیے دلِ ناکام سے سبب |
| یہ کچھ نہیں ہے اپنا ہی پھیلایا شر ہے زیبؔ |
| حالات و داستاں کے تغیر کی خیر ہو |
| کس دل میں تم بسے ہو، کہاں سے گزر ہے زیبؔ |
| یہ ماجراۓ شوق و جنوں کیا بتاؤں میں |
| عقل و خرد بھی بے خبر و بے خطر ہے زیبؔ |
| ملتے ہیں سب یہیں پہ یہیں پر بچھڑتے ہیں |
| دشتِ ملال دشتِ جنوں کا سفر ہے زیبؔ |
معلومات