| نہ علم کی نہ شرافت کی ہے ضیا بخشے |
| یہ مال و دولتِ دنیا کسی کو کیا بخشے |
| رہا ہے ظلم کا خاموش جو تماشائی |
| صدا اُٹھائے زمانہ خدا حیا بخشے |
| یہ تیرہ شب ہے طوالت میں بڑھتی جاتی ہے |
| عطا ہو روشنی دل کو خدا دیا بخشے |
| زمانہ کر رہا ہے آگہی کا ساماں خود |
| دعا ہے عقل کو بھی اب خدا جِلا بخشے |
| بلٰی کا عہد کیا اور بُھلا دیا اس نے |
| رہے جو یاد تو انسان کو وفا بخشے |
| خدا کرے کہ دعائیں قبول ہوں اس کی |
| کہے کسی کے لئے جو اُسے خدا بخشے |
| رہی ہے میری تمنّا مرا خدا مجھ کو |
| اثر ہو جس میں کچھ ایسی مجھے صدا بخشے |
| میں کر رہا ہوں خدا سے یہ التجا کہ مرا |
| عمل قبول کرے اور کہا سنا بخشے |
| سرہانے بیٹھ کے طارق کہیں گے سب اک دن |
| وہ ایک شخص نڈر تھا اسے خدا بخشے |
معلومات