| بھلا پوچھے تو کوئی قوم و ملت کے سپوتوں سے |
| کہاں کھوئی حمیت جانے، غیرت کے سپوتوں سے |
| ندارد ہے، مودت بھی، مروت بھی، مسرت بھی |
| سبب آخر ہے کیا سمجھے اخوت کے سپوتوں سے |
| مصیبت میں ڈٹے رہنا ہی پایا ہے وراثت میں |
| نہ چھوٹے صبر کا دامن عقیدت کے سپوتوں سے |
| نہ ڈرنا ہو حوادث سے، نہ راہوں سے پلٹنا ہو |
| مقدر ہو درخشاں تب ہی عظمت کے سپوتوں سے |
| فنا کرتے ہیں جب ناموس اپنی قوم کی خاطر |
| زمانہ پیار پھر کرتا ہے عصمت کے سپوتوں سے |
| رخ طوفاں کو گر اپنی دلیری سے پلٹتے ہیں |
| دلی میلان ہوگا ایسے جرات کے سپوتوں سے |
| نہ حائل داخلی تفریق ہو ناصؔر نہ ہی رنجش |
| یہی ہے بس تمنا دل میں امت کے سپوتوں سے |
معلومات