| خمارِ عشق مجھ کو دم بہ دم ہے |
| مرے ساقی کا یہ لطف و کرم ہے |
| ذرا قدموں پہ اپنے دیکھیے تو |
| شکستہ دل مرا زیرِ قدم ہے |
| نہ پوچھو عشق کی دنیا میں ہے کیا |
| یہاں بس کرب ہے، ہجر و الم ہے |
| یہ داغِ دل بھی دیگی جاں بھی لیگی |
| رهِ الفت سراپا پرُ ستم ہے |
| بسا ہے دل میں جب سے وہ ستمگر |
| فغاں ہے درد ہے اور چشمِ نم ہے |
| کوئی جائے تو ان سے لائے دل کو |
| چُرا کے لے گیا میرا بَلم ہے |
| نہ کوئی ہم نوا نا کوئی ہمدم |
| تمہارا آسرا بس اے صنم ہے |
| برائے عاشقاں آتش حرامست |
| کتابِ عشق میں نقل و رقم ہے |
| نہیں آئی ابھی کامل تباہی |
| ترا کوہِ ستم ہے ،پر یہ کم ہے |
| کیا ہر قید سے آزاد مجھ کو |
| جنابِ عشق کا رحم و کرم ہے |
| مکان و در تری گلیاں گزر گاہ |
| *اثر* کے واسطے عینِ حرم ہے |
معلومات