| ہو ذکر میرے لب پر ہر صبح و شام تیرا |
| میں تو رہوں یہاں بس ہو کر مدام تیرا |
| ابتر ہے حال میرا سن لے مرے خدایا |
| مجھ پر نمایاں کردے اب قربِ تام تیرا |
| ربِ کریم تجھ سے میری یہ التجا ہے |
| ”جاری رہے زباں پر ہر دم کلام تیرا“ |
| فہم و قیاس کی زد میں ہیں سبھی یہاں پر |
| عقل و خرد کی زد سے باہر مقام تیرا |
| مثلِ رشید احمدؒ، اشرف حکیمؒ و قاسمؒ |
| یا رب ہو میرے دل کا فکرِ دوام تیرا |
| توفیق دے تو یا رب نکلوں تری عطا سے |
| راہِ صراط سے میں لے لے کے نام تیرا |
| سائے میں اپنے یا رب مجھ کو جگہ تو دینا |
| اک آسرا ہی ہوگا روزِ قیام تیرا |
| میری دعا ہے اک دن رب کی عطا سے ہوگا |
| راہِ خدا میں احسنؔ قصہ تمام تیرا |
معلومات