| صبح ہی شام کا منظر ہوا دل |
| اک گلستان سے کھنڈر ہوا دل |
| مجھ سے مت پوچھو مری بے تابی |
| وہ نظر کیا اٹھی ساغر ہوا دل |
| حسن کی گرہیں کھلیں پے در پے |
| ایک مدت میں شناور ہوا دل |
| کیا عمق تھی ترے غم میں جاناں |
| ایک قطرے سے سمندر ہوا دل |
| پہلے کچھ خواب سے چہرے تھے مقیم |
| پھر کسی بے کلی کا گھر ہوا دل |
| دم بہ دم لاکھ ستم ٹوٹے ہیں |
| اور یوں موم سے پتھر ہوا دل |
| دیکھ کر خود کو پریشاں بھی نہیں |
| کیسی بد حالی سے خوگر ہوا دل |
| دل کی شاخوں پہ یوں آہیں پھوٹیں |
| ہوتے ہوتے ہی سخن ور ہوا دل |
| آخری لمحے پہ یہ سوچتا ہوں |
| آخرش خوار ہی کیوں کر ہوا دل |
| لمحہ لمحہ ہوئی ہے وحیِ جنوں |
| عشق مذہب میں پیمبر ہوا دل |
| اب تو وہ پہلی سی برسات نہیں |
| جذبوں کے قحط سے بنجر ہوا دل |
| پہلے تو آہوں کی آتش بھڑکی |
| پھر جہنم کے برابر ہوا دل |
معلومات