| تم جو کاجل سے بھری آنکھ کو پیہم دیکھو |
| ہے پسِ پردہ کہیں دیدۂ پُر نم دیکھو |
| مندمل ہونے سے پہلے ہی سکوں دے دے گا |
| زخم کو اُس پہ لگا کر کبھی مرہم دیکھو |
| صرف ہمدردی کا اظہار ہی کافی تو نہیں |
| کیوں کسی گھر میں بچھی ہے صفِ ماتم دیکھو |
| اس کو درپیش کٹھن لمبا سفر ہے کوئی |
| گرد افشاں ہیں بہت گیسوئے پُر خم دیکھو |
| فکر کے سائے عیاں ہوں یہ ضروری تو نہیں |
| مسکراہٹ ہے چھپائے ہوئے کیا غم دیکھو |
| تم اگر اس پہ اچٹتی سی نظر بھی ڈالو |
| زندگی کے ہیں مطالب ہوئے مُبہم دیکھو |
| تم نے تنقید کی نظروں سے انہیں دیکھا تھا |
| کون اس بات پہ ہوتا نہیں بَر ہَم دیکھو |
| پھول کی پتّی تر و تازہ نظر آئے جب |
| ہے گہر لگتا ہر اک قطرۂ شبنم دیکھو |
| کچھ تو شاہوں کو بھی صدمات ہوا کرتے ہیں |
| سرنگوں ہوتے ہوئے قصر پہ پرچم دیکھو |
| ڈھونڈنا ہے تو کوئی اس کا شناسا ڈھونڈو |
| آشنا اس سے جو ہو گا کوئی محرم دیکھو |
| یہ نہ ہو وقت گزر جائے ملاقات نہ ہو |
| اس کو دیکھا ہی نہ ہو موت کا عالم دیکھو |
| طارِق اُس وقت محبّت سمجھ آ ئے گی تمہیں |
| خود کو روتے ہوئے ہنستے ہوئے باہم دیکھو |
معلومات