کی وفا ہم سے تو غیر اس کو جفا کہتے ہیں - مرزا غالب - عروض

29 جولائی 2020
غزل

مرزا غالب

کی وفا ہم سے تو غیر اس کو جفا کہتے ہیں

ہوتی آئی ہے کہ اچھوں کو برا کہتے ہیں

آج ہم اپنی پریشانئ خاطر ان سے

کہنے جاتے تو ہیں، پر دیکھئے کیا کہتے ہیں

اگلے وقتوں کے ہیں یہ لوگ، انہیں کچھ نہ کہو

جو مے و نغمہ کو اندوہ رُبا کہتے ہیں

دل میں آ جائے ہے، ہوتی ہے جو فرصت غش سے

اور پھر کون سے نالے کو رسا کہتے ہیں

ہے پرے سرحدِ ادراک سے اپنا مسجود

قبلے کو اہلِ نظر قبلہ نما کہتے ہیں

پائے افگار پہ جب سے تجھے رحم آیا ہے

خارِ رہ کو ترے ہم مہرِ گیا کہتے ہیں

اک شرر دل میں ہے اُس سے کوئی گھبرائے گا کیا

آگ مطلوب ہے ہم کو ،جو ہَوا کہتے ہیں

دیکھیے لاتی ہے اُس شوخ کی نخوت کیا رنگ

اُس کی ہر بات پہ ہم نامِ خدا‘ کہتے ہیں

وحشت و شیفتہ اب مرثیہ کہویں شاید

مر گیا غالبِؔ آشفتہ نوا، کہتے ہیں

کی وفا ہم سے تو غیر اس کو جفا کہتے ہیں

بحر

1181

اشعار کی تقطیع

تقطیع دکھائیں