| مزے جہان کے اپنی نظر میں خاک نہیں |
| سوائے خونِ جگر، سو جگر میں خاک نہیں |
| مگر غبار ہُوے پر ہَوا اُڑا لے جائے |
| وگرنہ تاب و تواں بال و پر میں خاک نہیں |
| یہ کس بہشت شمائل کی آمد آمد ہے؟ |
| کہ غیرِ جلوۂ گُل رہ گزر میں خاک نہیں |
| بھلا اُسے نہ سہی، کچھ مجھی کو رحم آتا |
| اثر مرے نفسِ بے اثر میں خاک نہیں |
| خیالِ جلوۂ گُل سے خراب ہیں میکش |
| شراب خانے کے دیوار و در میں خاک نہیں |
| ہُوا ہوں عشق کی غارت گری سے شرمندہ |
| سوائے حسرتِ تعمیر۔ گھر میں خاک نہیں |
| ہمارے شعر ہیں اب صرف دل لگی کے اسدؔ |
| کھُلا، کہ فائدہ عرضِ ہُنر میں خاک نہیں |
بحر
|
مجتث مثمن مخبون محذوف
مفاعِلن فَعِلاتن مفاعِلن فَعِلن |
||
|
مجتث مثمن مخبون محذوف مسکن
مفاعِلن فَعِلاتن مفاعِلن فِعْلن |
اشعار کی تقطیع
تقطیع دکھائیں
معلومات