ہر قدم دوریٔ منزل ہے نمایاں مجھ سے - مرزا غالب - عروض

29 جولائی 2020
غزل

مرزا غالب

ہر قدم دوریٔ منزل ہے نمایاں مجھ سے

میری رفتار سے بھاگے ہے ، بیاباں مجھ سے

درسِ عنوانِ تماشا ، بہ تغافل خوش تر

ہے نگہ رشتۂ شیرازۂ مژگاں مجھ سے

وحشتِ آتشِ دل سے ، شبِ تنہائی میں

صورتِ دود ، رہا سایہ گریزاں مجھ سے

غمِ عشاق نہ ہو ، سادگی آموزِ بتاں

کس قدر خانۂ آئینہ ہے ویراں مجھ سے

اثرِ آبلہ سے ، جادۂ صحرائے جنوں

صورتِ رشتۂ گوہر ہے چراغاں مجھ سے

بے خودی بسترِ تمہیدِ فراغت ہو جو!

پر ہے سایے کی طرح ، میرا شبستاں مجھ سے

شوقِ دیدار میں ، گر تو مجھے گردن مارے

ہو نگہ ، مثلِ گُلِ شمع ، پریشاں مجھ سے

بے کسی ہائے شبِ ہجر کی وحشت ، ہے ہے!

سایہ خورشیدِ قیامت میں ہے پنہاں مجھ سے

گردشِ ساغرِ صد جلوۂ رنگیں ، تجھ سے

آئینہ داریٔ یک دیدۂ حیراں ، مجھ سے

نگہِ گرم سے ایک آگ ٹپکتی ہے ، اسدؔ!

ہے چراغاں ، خس و خاشاکِ گلستاں مجھ سے

ہر قدم دوریٔ منزل ہے نمایاں مجھ سے

بحر

1152

اشعار کی تقطیع

تقطیع دکھائیں