| گستاخی ہے اس منہ سے کروں تیری مدح میں |
| الفاظ لرزتے ہیں کروں کیسے میں اظہار |
| پھر بھی ہے ضروری کہ ہو اظہارِ حقیقت |
| خورشید فلک کیسے رہے در صفِ اسرار |
| ہے تیری وداعی کہ قیامت کی گھڑی ہے |
| ہیں چاک گریباں ابھی یاں ہر در و دیوار |
| ہر غنچے یہاں روتے ہیں اور رونا بھی کیسا |
| آنسو میں سبھی ڈوبے ہیں اور آنکھ ہے خوں بار |
| چہرے میں ہے وہ نور کہ روشن ہے یہ دنیا |
| تیرے نفسِ گرم سے ہے گرمیٔ احرار |
| بدعات و رسومات کو تو برقِ اجل ہے |
| ملحد کے لیے موت تری ایک ہی چنگھاڑ |
| تیرے فکر و نظر کا ہر خضر مقلد |
| مانا کہ مقلد ہے خضر کا بھی یہ سنسار |
| کہتا ہے جو تو لکھا ہے وہ لوح و قلم کا |
| تھوکر سے تری آج ہیں گردش میں یہ سیار |
| تو نے جسے پھٹکار دیا بتلاؤں خالق |
| دنیا ہی کیا اس پر تو ہے اللہ کی پھٹکار |
| جرات بھی کرے کیسے وہ اسلام کا بدخواہ |
| میداں میں چمکتی ہوئی خالق کی ہے تلوار |
| اصحاب نبی کی کوئی کرتا ہے جو تنقیص |
| کرتا ہے اسے خاک وہ خالق کا ہے انگار |
| ایمان کی منقار میں ہر کفر ہے محبوس |
| فتراک میں مغرب کے خداوند گرفتار |
| کچھ دور نہیں بھسم کرے اب اسے یکلخت |
| مغرب کے نشیمن کو ترا شعلۂ افکار |
| تو نے ہی تو یاں زندہ کیا رسمِ بلالی |
| تجھ سے ہی تو باقی رسمِ قبہ و دستار |
| ہاں توڑ دیا عشق سے ہر ظلم کا پنجہ |
| اللہ نے بروقت کیا تجھ کو خبر دار |
| اپنے گدازِ چشم سے ہاں آج اے خالق |
| تو نے تو گراں کر دیا ایمان کا بازار |
| بیدار کیے یاں کئی خوابیدہ سے ذرے |
| ہر ذرہ ہے وہ جس سے ہے خورشید شرمسار |
| ہے تیرے ہی سازوں سے یاں نغموں کا تلاطم |
| ساغر سے ترے پی کے ہے ہر رند ہے یاں ہشیار |
| پروانہ تڑپتا ہے کہ بس ہو نثارِ شمع |
| ہر جلوہ تڑپتا ہے کہ کر لوں ترا دیدار |
| ہے تیرا ہی شعلہ ہے جو خورشید میں گرمی |
| ہے ذوقِ سفر تیرا جو عالم میں ہے رفتار |
| ممکن نہیں گیدڑ سے مرے شیر کی تسخیر |
| ہرچند کہ کوشاں ہیں سب مغرب کے بھی عیار |
| ہرچند ہو عالم کو مسیحا کی تمنا |
| تجھ سے ہی دوا مانگے مسیحا سا بھی بیمار |
| شاداں ہے یہ دنیا فقط تسخیرِ قمر سے |
| تو حدِّ ثریا سے گزر جاتا ہے سو بار |
| تھا تیری نظر کی تبِ خورشید کا نتیجہ |
| ہے عالمِ الحاد جو ایمان سے سرشار |
| ایماں کی تب و تاب کو تیرے کوئی دیکھے |
| رہبر کی مدح اور یہ ثانی کا بیاں اف |
| میں اتنا ہی کہتا کہ تو ملت کا ہے غم خوار |
| گفتار تجھے لگتی ہے اک زہرِ ہلاہل |
| خرسند ہے کہ تجھ میں ہے بس گرمیٔ کردار |
| تو نے تو انھیں ان کے ہی جالوں میں کیا قید |
| مغرب جو ہے مؤمن کے لیے در پئے آزار |
| بیدار کیا تو نے ہی تو آہ و نوا سے |
| رحمت ہے تو ملت کے لیے اس میں کیا تکرار؟ |
| تو حق کو کہے حق تو ہے یہ تیرا طریقہ |
| ظلمت کو کہے نور وہ مغرب کا ہے ہنجار |
| تیری ہی تو گونجی ہے یاں تکبیرِ مسلسل |
| تو نے ہی تو توڑے ہیں سبھی کفر کے پندار |
| ہیں اور بھی محفل میں یہاں ساقیٔ خوشتر |
| یکتائی کا اقرار ہے کیا خویش کیا اغیار |
| ایماں کے سفر میں ہے یہاں میرِ سفر تو |
| پیرو ہیں ترے آج سب اسلام کے انصار |
| مغرب کے خداوندوں نے تو کر دیا محبوس |
| اسلام ہے آزاد ہے یہ تیرا ہی اصرار |
| تیری نظر و فکر سے ہر شے میں بصارت |
| بے نور بھی یاں ہو لیے اب صاحبِ ابصار |
| تو نے تو اس شطرنج میں مہرہ ہے وہ مارا |
| یورپ کے خداوندوں کی کاوش ہوئی بے کار |
| پیتے ہی تری مے کو بہکتے ہی گئے ہیں |
| ہر چند کہ مے خانے میں ساقی کی ہے بھرمار |
| حیران ہوں خود کیا کہوں میں ایسی ادا پہ |
| دل بر کہوں دل جاں کہوں یا پھر کہوں دلدار |
| تو چاہتا ہے جیسا خدا کرتا ہے ویسا |
| ہے تو وہ گدا جس کا ملِک ہو کفش بردار |
| تیرے برقِ گرم سے ظلمت کدہ روشن |
| بلکہ ہوئے انوار بھی اب صاحبِ انوار |
| حق نے تو تجھے کر بھی دیا اپنا شناور |
| خوش تیرے نفسِ گرم سے ہیں ہادیٔ مختار |
| تو نے کیا مغرب کی تجارت سے خبردار |
| آگاہ کیا نافع ہے اسلام کا بیوپار |
| ہے تیرا طریقہ رہِ ابرار سے مربوط |
| ہے تیری نگہ بس نگہِ حیدرِ کرار |
| تو نے جو پلائی ہے تو مدہوش ہیں اب تک |
| تا حشر نہیں ہوش میں آئیں گے یہ مے خوار |
| ہاں عشق بھلا کیوں رہے اب حسن کا نوکر |
| مل عشق کے رخسار پہ یہ غازۂ سنگار |
| پھر ہوگا نہیں تو کبھی پھولوں کا گلومند |
| ہاں دیکھ تو تو چل کے کبھی وادیٔ پر خار |
| پھر عشقِ محمد سے کرو دنیا کو آگاہ |
| مغرب نے تو اب بدلا کیے عشق کے معیار |
| تسبیحِ محمد تجھے پہنچا دے فلک تک |
| تہذیبِ فرنگی کا اگر توڑ دے زنار |
| ہوں گے بھلا ایماں کے شرارے کبھی برپا |
| دل پر ترے تہذیبِ فرنگی کا ہے زنگار |
| ہے تجھ کو تنزل کے تھپیڑوں کی شکایت |
| تو خود ہوا تہذیبِ محمد سے یوں بیزار |
| اب بھی نہیں کچھ دور کہ از عشقِ محمد |
| ویرانۂ اسلام کو کر سکتے ہو گلزار |
| ثانی ترے اشعار کے ان برق و شرر سے |
| ہو سکتا ہے جل جائیں گے حساد کے گھر بار |
| کھنچتے ہیں رقیباں بھی ان اشعار پہ ثانی |
| لگتا ہے کہ طلسم میں پروئے تو نے اشعار |
| ہے کون سا گوشہ نہ گئی تیری صدا واں |
| تا دشت و جبل بر و بحر دامنِ کہسار |
معلومات