جو صدائیں دھڑکنِ دل نے دیں، وہی آج نوکِ زباں پہ ہیں

مگر حسن کی سبھی تہمتیں مرے عشقِ رقص کناں پہ ہیں

کہ غزل کا خرمنِ جاں ابھی نہیں آشنا تری پھونک سے

سو یہ چشم و لب کے جو شعلے ہیں مری فکر و فن کے دھواں پہ ہیں

جو اندھیری رات میں چاند کا نیا روپ ہے نیا رنگ ہے

مرے لب کے سیاہ سے دائرے ترے جسمِ مہر چکاں پہ ہیں

یہ مشاعرہ یہ ادب کی شامِ غزل، یہ شمعِ شبِ سخن

یہ ادیب اردو ادب کے ہیں یہ جو بوجھ اردو زباں پہ ہیں

اسی جوشِ عشق و جنوں پہ اب یہ زمانہ سنگ فشاں ہوا

وہی غم کا کوہِ گراں لیے ترے غم کے کوہِ گراں پہ ہیں

ترا وہم روپ بنا کرے ترا ہجر دھوپ ہُوا کرے

ابھی تشنگی کی وہ شدتیں لبِ بادِ آب رَساں پہ ہیں

تو نگاہ سے تو اشارہ کر مرے آنسوؤں کو ستارہ کر

کہ نمازِ عشق کی راحتیں تو ترے لبوں کی اذاں پہ ہیں