| رب سے یہ دعا مانگی |
| ::::::::::::::::::::::::::::: |
| ،،،،،،،،،،،،،،،،،، |
| طولِ شبِ ہجراں میں ، رب سے یہ دعا مانگی |
| آئے جو درِ اقدس سے بس وہ ہوا مانگی |
| بیمار محبت کا بے چین پھرے کب تک |
| اس درد کی میں نے تو ان سے ہے دوا مانگی |
| دن رات گناہوں کی شامت سے لگی کالک |
| مٹ جائے وہ نامے سے بس ایسی صفا مانگی |
| یہ آنکھ اٹھے تو ان کا جلوہ نظر میں ہو |
| غیروں سے نظر ہٹ جائے ایسی حیا مانگی |
| جاتے ہیں مسافر کتنے شہرِ مدینہ میں |
| یوں دیکھ کے میں نے حسرت سے وہ فضا مانگی |
| اشکوں سے کروں چھڑکاؤ اور ہو پلک جھاڑو |
| جاروب کشی کی اس در پر ، ہے دعا مانگی |
| خطرہ ہے وہاں دل کی دھڑکن نہ ہو بے قابو |
| تو کوئے نبی میں اس دھڑکن سے شفا مانگی |
| فریاد کرے دل وہ آواز سنیں دل کی |
| ہو شور وہاں ، کب ایسی آہ و بکا مانگی |
| سب مجھ کو کہیں یہ تو ہے دیوانہ مدینے کا |
| گر ہے یہ ریا تو میں نے ان سے ریا مانگی |
| ماں باپ بہن بھائی اور زوجہ قبیلہ سب |
| اولاد فدا ہو ان پر ایسی وفا مانگی |
| ناموس پہ ان کی میں جی جان سے پہرا دوں |
| سو جان فدا ان پر ، یہ جان کُجا مانگی |
| چادر پہ لگی ہو خوشبو ان کے پسینے کی |
| بن جائے کفن اس کا اک ایسی رِدا مانگی |
| بس وقتِ اجل اپنا دیدار کرا دیں وہ |
| پھر روح بدن سے نکلے ایسی قضا مانگی |
| ہے رات اندھیری گورِ تیرہ میں تو میں نے |
| چمکے جو رخِ انور سے بس وہ ضیا مانگی |
| مخلوق سرِ محشر توصیف کرے ان کی |
| تب نعت سناؤں ان کو ایسی ثنا مانگی |
| ہو تاج ترا رضوی ، سرکار کی نعلِ پاک |
| پھر جھوم اٹھوں قسمت پر ایسی عطا مانگی |
| ،،،،،،،،،،،،،،،،،،،،،،،،،،،،،،،،،،،،،،،، |
| عرض نمودہ:ابو الحسنین محمد فضلِ رسول رضوی |
| 14 ربیع الآخر 1446ھ/ 18 اکتوبر 2024ء |
| بروز جمعة المبارک دس بج کر پچاس منٹ |
| ؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛؛ |
معلومات