| عرشِ بریں پہ آپ کی یہ شان دیکھئے |
| رب کا درود اُن پہ ہے ہر آن دیکھئے |
| ستر ہزار روز فرشتوں کی حاضری |
| جبریل در کے ہیں یہاں دربان دیکھئے |
| دنیا میں پل صراط پہ محشر میں ہر جگہ |
| سرکار نے کیا ہے کیا احسان دیکھئے |
| جز نعتِ مصطفیٰ کے تو حُسنِ عمل نہیں |
| آقا کا مجھ پہ کتنا ہے احسان دیکھئے |
| نعتِ نبی جو حشر میں تولا عمل کے ساتھ |
| نیکی کا پلڑا جھک گیا میزان دیکھئے |
| سارے شجر حجر ہی کیا کنکر گواہی دیں |
| " اللہ کے حبیب ہیں یہ شان دیکھئے " |
| یاسین ہے کہا کہیں والشمس و القمر |
| نعتِ نبی ہے سارا ہی قرآن دیکھئے |
| عرشِ بریں پہ دید کی خاطر بلا لیا |
| اللہ کے ہیں آپ ہی مہمان دیکھئے |
| کعبہ ادب سے جھک گیا بُت سارے گر پڑے |
| میلادِ مصطفیٰ کی ہے کیا شان دیکھئے |
| واللیل والضحی سے یہ ظاہر ہوا سخی |
| نورِ نبی کا ہر سُو ہے فیضان دیکھئے |
معلومات