| نعتِ رسولِ مقبول صلی اللہ علیہ وآلہ و اصحابہ و بارک وسلم |
| کلام :ابوالحسنین محمد فضلِ رسول رضوی کراچی |
| مانگنا تم کو تمہی سے یہ ادا اچھی رہی |
| یہ گدا اچھا رہا اور یہ صدا اچھی رہی |
| جو ربیعہ سے کہا تھا سَلْ مجھے بھی یوں کہو |
| تو کہوں میں ہاں مجھے بس یہ عطا اچھی رہی |
| بُوْ ہُرَیْرہْ حافِظَہْ پائیں حدیثیں یاد ہوں |
| میں کہوں مجھ کو ملی ہے یہ دوا اچھی رہی |
| بُوْ ہُرَیْرہْ والدہ سے تھے پریشاں، خوش یہاں |
| والدہ کو پھر نبی کی یہ دعا اچھی رہی |
| ٹھیک ہو چشمِ علی یہ ہے لعابِ پر اثر |
| کچھ ملیں چھینٹے کہوں میں بھی شفا اچھی رہی |
| آنکھ اچھی ہو قتادہ کی تمہارے فیض سے |
| چشمِ دل روشن کرو کہہ دو عَمیٰ اچھی رہی |
| پھر بلاؤ اب مدینے شہر میں بہرِ خدا |
| اور کہوں میں بھی وہاں جا کر ندا اچھی رہی |
| میں چلوں اپنی نگاہوں کو جھکا کر با ادب |
| سب کہیں خوش ہو ارے یہ ابتدا اچھی رہی |
| پھر چلے ایسی ہوا نوری فضا میں جاں فزا |
| بے خودی سے یوں کہوں ایسی ہوا اچھی رہی |
| جب اٹھے مٹی وہاں سے تو کروں رخ سامنے |
| دور ہو رخ کی سیاہی یہ صفا اچھی رہی |
| حاضری روضے پہ ہو اور ہو تمنا دید کی |
| تم کہو پردہ ہٹا کر التجا اچھی رہی |
| کاش ہو وقتِ اجل روضے پہ سر اپنا دھرا |
| سب کہیں یوں دیکھ کر یہ انتہا اچھی رہی |
| اور بنے مدفن مدینے کے مسافر کا وہاں |
| ہو خوشی یہ آخری میری سَرا اچھی رہی |
| قبر میں تم آپ آؤ تو کہوں اے شاہِ من |
| آپ آئے نور چھایا یہ ضیا اچھی رہی |
| پھر فرشتے چھوڑ دیں جب دیکھ کر سرکار کو |
| قبر میں آقا تمہاری انتما اچھی رہی |
| جب قیامت کو تُلے ہر اک خطا میزان میں |
| جب نظر ہوگی تمہاری تو خطا اچھی رہی |
| نعت کا جب وزن ہو تو جرم کا پلڑا جھکے |
| حشر میں رضْوی کہیں سب یہ ثنا اچھی رہی |
| از ابو الحسنین محمد فضلِ رسول رضوی کراچی |
معلومات