| تُو نے دیوانہ بنایا تو میں دیوانہ بنا |
| اب مجھے ہوش کی دنیا میں تماشا نہ بنا |
| عشق میں دیدہ و دل شیشہ و پیمانہ بنا |
| جُھوم کر بیٹھ گئے ہم وہیں میخانہ بنا |
| یوسفِ مصرِ تمنا تیرے جلوؤں کے نثار |
| میری بیداریوں کو خوابِ زلیخا نہ بنا |
| ذوقِ بربادیٔ دل کو بھی نہ کر تُو برباد |
| دل کی اُجڑی ہوئی بگڑی ہوئی دنیا نہ بنا |
| یہ تمنا ہے کہ آزادِ تمنا ہی رہوں |
| دلِ مایوس کو مانوسِ تمنا نہ بنا |
| نگہِ ناز سے پوچھیں گے کسی دن یہ ذہینؔ |
| تُو نے کیا کیا نہ بنایا کوئی کیا کیا نہ بنا |
معلومات